Qırım Nazirler şurasında Sergey Aksenov tarafından Tatlı ses ğaliplerini mukâfatlav tedbiri ve menim bu tedbirde iştirak etkenime daim yazılacaq (ve endi) yazılğan şeylerni tahmin etip, birden aytayım. Qırımtatarlarnıñ bir ata sözü bar: «Dinim içün degil – künüm içün». Manası (tam olmasa da) «Dinni degil – künni bağışla» demektir.
Yüzlernen insan beraber toplaşıp, öz halqınıñ medeniyeti, tili, istidatlı balalarınen ğururlanğanından başları kökke yetken olsa, bu künge yazıqsınmayım. Olar bir duyğu etrafında birleşip, 16 yaşında Safiye Denişayeva ve 9 yaşında Adile Çalbaş yırlağan Sabriy Erecepova içün ağlağan; 11 yaşında Saife Arakayeva ve 16 yaşında Zeyneb Muyedinovanıñ acayip oyunından ayrette qalğan olsalar, peşman degilim. Olar kene de ayaqqan turıp, Seyran 7.62 aytqan «Qırım.Vatan.Millet» sözlerini tekrarlağan olsalar, peşman degilim. O qadar qıyınlıqlardan ve ziyanlardan soñ milliy bayrağını köterip, ep beraber «Ant etkenmenni» yırlağan soñ peşman degilim.
Bu ÖMÜR pek qıymetlidir. Akimiyet ile razılaşma ve muzakerelerden emiyetlidir
Bu künge yazıqsınmayım, çünki qırımtatarlar, em de Qırım ve onıñ tışındaki «dostları» bir şey kördiler – balaları yırlasa, oynasa ve quvansa, halq yaşay demektir. Añlayım, bizni, Vatanda qalğanlarnı, fuqare, bahtsız alda, azap çekkenimizni körmek isteyler. OLMAZ! Çünki bizler azaplarımız, qurbanlarımız, zornen qazanğan quvançımıznıñ qıymetini bilip YAŞAYCAQMIZ!
Bu ÖMÜR pek qıymetlidir. Akimiyet ile razılaşma ve muzakerelerden emiyetlidir. Bu sebepten, adım ve taqımımıznı «ortağa çıqaracaq» olğan er kes, – nevbetke tiziliñiz. Ne qadar uzun nevbet olsa, o qadar yahşı. Anda olğanlarnıñ biraz fikir yürsetmege imkânları olur. Ve, belki de, añlarlar – cam evde oturğanlar ve onı saqlamağa tırışqanlar taş atmazlar.
Qırım balaları istidatlarını kösterdi (fotogalereya)
Lilâ Bucurova, Qırım jurnalisti
«Bloglar» rubrikasında bildirilgen fikir-tüşünceler müelliflerniñ noqtaiy-nazarlarını aydınlatıp, muarririyetniñ baqışları ile aynı olmaması mümkün