Rusiyede ve işğal etilgen Qırımda yaşağan on biñlernen Türkiye vatandaşı em akimiyet temsilcileri, em de tüşürilgen rus uçağı içün intiqam alacaq olğan adiy adamlarnıñ basqıları altında qaldılar. Keçken on yıl devamında Rusiyege celp etilgen bir sıra işçi, idareci ve iş adamı al-azırda duşmanlıq ile qarşılaştı.
Türkiye ava quvetleri Suriye ile sıñırda Rusiye cenk uçağını tüşürgen soñ Moskvada açuvlanğan adam sürüsi Moskvadaki Türkiye elçihanesine taş attı. Bundan soñra Rusiye devletiniñ Türkiye vatandaşlarına qarşı yapılğan areketleri ardı-sıra devam etmege başladı.
Россия – Турция: страсти по самолету (фотогалерея)
Rusiye öz tarafından vizasız rejimini toqtatqan soñ onlarnen Türkiye vatandaşına Rusiyege kirişi yasaq etildi. Charter seferleri iptal etildi, kelecek aydan başlap Rusiye şirketlerine türk hadimlerini işke almağa yasaq etildi.
«Qorantam içün qasevetlenem. Bir özüm olsa edim, problem olmaz edi»
Radio Svoboda Moskva mühbiri Rusiye qurucılıq şirketlerine türk donatmalarını satqan Rusiye şirketinde çalışqan Türkiye vatandaşı ile subetleşti. Onıñ ömür arqadaşı rus, amma adam basqı altında qaldı.
«Qorantam içün qasevetlenem. Bir özüm olsa edim, problem olmaz edi. Apayım qorqa, ne olacağını bilmey. Oğlumız bar, eyi haberlerni beklemek zorunda qaldıq», – dep qayd etti 34 yaşında Umut.
«Asılında Rusiyeden bütün türkler quvıp çıqarıla»
Bundan ğayrı, yıllarca iqtisadiyat munasebetlerini qurğan eki devlet arasındaki zıddiyet neticesinde türk studentleri de zarar köre, dep tüşüne Türkiyede çalışqan Qırım jurnalisti Osman Paşayev.
Osman Paşayev
«Rusiye tasil Nazirliginiñ türk studentleri içün iç bir telüke olmağanına dair resmiy beyanatlarını eşitemiz, amma, ekinci taraftan da, Rusiye Federatsiyasınıñ 50 aliy oquv yurtu Türkiye ile işbirligini toqtattı. Studentler tasil alamazlar. Asılında Rusiyeden bütün türkler quvıp çıqarıla. Aynı vaqıtta Türkiyede bulunğan Rusiye vatandaşlarına böyle bir şey yapılmay», – dep qayd ete jurnalist Osman Paşayev.
Yaqın şarq tedqiqleri merkeziniñ eksperti Sergey Danilovnıñ aytqanına köre, Rusiye devletler arasındaki zıddiyetler vaqtında munasebetler strategiyasını azırladı. Bu sebepten Türkiye vatandaşlarına yapılğan basqı – Rusiye devlet mehanizminiñ beklengen bir baqışıdır.
Sergey Danilov
«Rusiyede çirkin bir paradigma bar, zıddiyet başlağan memleketlerniñ vatandaşları ya da bu memleketke ait olğan halq temsilcileri vaziyetniñ reineleri ola. Olarnı sıñırlamağa başlaylar: sıq-sıq teşkereler, biznes işleri nezaret organları tarafından közetile, olarnıñ areketleri sıñırlana», – dep qayd etti Danilov.
«Qırımnıñ işğalci akimiyetiniñ qoqlaları yerli Türkiye vatandaşlarınıñ yaşayışını dayanılmaz alğa ketireler»
Türkiyege qarşı qırğınlıq işğal etilgen Qırımda da is etile. Yarımada «yolbaşçısı» Sergey Aksenov bütün türk malını boykot etmege qarar aldı. Faqat Qırımnıñ işğalci akimiyeti bu noqtada toqtalmadı. Yarımadada Türkiye vatandaşlarına basqı yapmağa başladılar. Bunı Qırımtatar Milliy Meclisi reisiniñ Türkiye işlerinden mesleatçısı İsmet Yüksel Radio Svobodağa ayttı.
Yarımadanıñ işğalci akimiyeti Türkiye vatandaşları işğal etilgen Qırımda çalışmaycaqlar, dep bildirdi
«Qırımda olğan şeyler – teatrdir. Qırımnıñ işğalci akimiyetiniñ qoqlaları yerli Türkiye vatandaşlarınıñ yaşayışını dayanılmaz alğa ketireler. Moskva ve Peterburgda olğanı kibi, Qırımda da türklerge zulum eteler. Evlerine kelip, sorğuğa çekeler. Elde etken malümatımızğa köre, üç ya da dört Türkiye vatandaşı sürgün etildi. Çoqusı özleri Qırımnı terk eteler», – dep ayttı İsmet Yüksel.
Bundan ğayrı, yarımadadaki türk tükânlarında tintüvler keçirildi. SHEN türk savut-saba tükânı qapatıldı. Yarımadanıñ işğalci akimiyeti Türkiye vatandaşları işğal etilgen Qırımda çalışmaycaqlar, dep bildirdi.
Metnniñ asıl nushası – Radio Svoboda saytında