Qırımtatar Milliy Meclisi ve «Avdet» gazetasınıñ muarririyeti yerleşken «Qırım» Fondu» hayriye teşkilâtınıñ binası uquq qoruyıcı organlarınıñ qoruvı altına keçmesinden soñ çöplük obasına çevirildi, deyler Qırımtatar Milliy Meclisinde.
Meclis matbuat hızmetiniñ malümatına köre, binada mülkiyet ğayıp oldı, mefruşat bozulğan, kâğıt, kitaplar dağılğan.
«Qırım» Fondu» hayriye teşkilâtı mahkemelerde işğalci akimiyetiniñ ayırım apparatı tarafından musadere etilgen mülkiyetini qaytarmağa tırışqanda, aynı şu akimiyetniñ bina ve mülkiyetni mahkeme qararına qadar qorumağa mecbur olğan strukturası Qırım sakinleri içün örnek olaraq «Rusiye medeniyetini» taqdim etti», – qayd etti fondnıñ başı, Qırımtatar Milliy Meclisiniñ azası Riza Şevkiyev.
Qırımnıñ rusiyeli uquq qoruycı organları tarafından Meclisniñ ve «Qırım» Fondu» yolbaşçılığı tarafından bina vaziyeti aqqında bildirüvine izaat daa yoq. Qırım.Aqiqat akimiyet temsilcileri ya da Qırım uquq qoruyıcı organlarınıñ izaatını almağa tırışa.
«Qırım» Fondu»na nisbeten Qırım Rusiye memuriyetiniñ uquq qoruyıcı organları tarafından cinaiy ve memuriy işler açıldı.