«Siyasiy kommunikatsiyalar regional institutı» Qırım cumhuriyet ilmiy-tedqiqiy cemaat teşkilâtı «Qırımda şimdiki siyasiy vaziyetniñ nezareti» leyhasına başlay.
Teşkilâttа bildirilgeni kibi, leyha maqsadı – «Qırımda içtimaiy-siyasiy ketişat içün müim olğan malümatnıñ toplanuvı, tertipleşüvi ve talil»den ibarettir.
Nezaret devamında Qırımda siyasiy vaziyetniñ ilerilecegi boyunca tahminler çıqarılacaq.
İnstitutnıñ müdiri İvan Mezüho degeni kibi, «Qırımda şimdiki vaziyetniñ nezareti» daima çalışacaq bir leyha olur, teşkilâtınıñ faalleri onı amelge endi keçirmekteler.
«Vatandaşlıq cemiyetniñ diger institutları ile cemaat fikri ögrenilecek, araştırmalar, tögerek masa ve munaqaşalar keçirilecek. Yaqın vaqıtta endi bir sıra meseleler boyunca izaatlar aşkâr etilecektir», – dey Mezüho.
«Siyasiy kommunikatsiyalar regional institutı» Qırım cumhuriyet ilmiy-tedqiqiy cemaat teşkilâtı Qırımda akimiyet tarafdarı, ekspertleri cumhuriyet yolbaşçılığına riayetkâr dep sayıla.