Ukraina prezidentiniñ qırımtatar halqınıñ işlerinden vekâletlisi Mustafa Cemilev Kiyevde İsveçiya ve Litvaniya Tış işler nazirleri – Margot Wallström ve Linas Linkeviçius ile körüşti.
«Subet devamında Qırımda Rusiye işğalci akimiyeti tarafından alıp barılğan ayırım siyasetiniñ ilerilevi aqqında tarif ettik. Margot hanımnıñ: «Qırımda Ukraina ve dünya tarafından yardım duyulamı? Vatandaşlarıñız içün ne yapa bilemiz?» kibi suallerine: «Вar küçümiz Qırımnıñ azat etilmesi içün sarf etilmeli, yapa bilecegimiz budır» dep cevap berdik,– qayd ete Ukraina prezidentiniñ qırımtatar halqınıñ işlerinden vekâletlisiniñ matbuat hızmeti.
Aqmescitniñ Kiyev rayon mahkemesi noyabr 17 künü fevral 26 vaqiaları boyunca yaqalanğan ve apiste bulunğan eki qırımtatar faali Ali Asanov ve Mustafa Degermenciniñ tevqif müddetlerini 2016 senesi fevral 19-na qadar uzattırdı, olar şimdi Aqmescitniñ SİZOsında bulunalar. Qırımtatar Milliy Meclisi reisiniñ muavini Ahtem Çiygoznıñ ceza qararı boyunca mahkeme toplaşuvı keçti, neticede apis müddetini 2016 senesi yanvar 29-na qadar uzattılar.
Yılnıñ başından QMC prokuraturası tarafından qırımlılarnıñ aqları bozuluvı boyunca 156 cinaiy iş açıldı. Bu işlerde Qırımda vatandaşlarnıñ öldürüvi, hırsızlavı ve diger cinayetler qayd etildi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.