Qırım rusiyeli akimiyeti 2016 senesi Rusiye devlet bücetinden yollar qurucılığı ve tamirine 20 mlrd ruble bekley. Bunı Qırım rusiyeli ükümetiniñ naqliyat naziri Andrey Bezsalov bildirdi.
«Umumen yol faaliyetine 20 mlrd ruble ayırıldı. Vazifemiz – saanıñ faal işini temin etmek ve ayırılğan paranı doğru qullanmaq», – dep bildire Bezsalovnıñ sözlerini yarımadanıñ rusiyeli ükümetiniñ matbuat hızmeti.
Şu cümleden, aytqanı kibi, Aqmescit – Yalta yolunıñ tamiri planlaştırıla. Bu maqsatqa 3,8 mlrd ruble ayırılacaqtır.
Nazirniñ sözlerine binayen, 2015 senesi yol tamirine 4,2 mlrd rubley berildi, al azırda bu paranıñ tek 60% işlettirildi. Bezsalov ümüt etkeni kibi, qalğan para noyabr soñuna qadar qullanılır.
«Bu sene 136 km regionlarara ve 100 km belediye yollarını tamirlemege çare olur», – dey o.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.