Aqmescitte belgisiz şahıslar salonında qırımtatar bayrağı olğan Skoda Superb maşinanı bozdılar. Qırım.Aqiqat mühbirine maşina saibi degeni kibi, vaqia noyabr 8 künü aqşam Moskoltsodaki Kiyevskaya soqağı mesken rayonında yüz berdi. Cinayetçiler maşina camında qırımtatarlarnı aqaretlegen yazını tırnadı ve köpçekni teştiler.
«Tahminen saat 20:30 rayondan çıqmaqta edim. Yerimden yolğa ağır çıqtım. Bir qaç metr keçip, bir şeyniñ qaqqanını eşittim. Toqtadım, arttaki sağ köpçegim teşik eken. Onı deñiştirmege başlayım, apansızdan sağ qapıdaki yazını körem: «Tatarı – p…sı». Maşinanı mıhnen tırnadılar, köpçekni teştiler», – dey o.
Bunı o maşinada qırımtatar bayrağı olğanınen bağlay: «Yanımda dülger edi, aytqanı kibi, yaqında belgisiz şahıslar içinde qırımtatar bayrağı olğan «Jiguli» maşinasınıñ köpçegini de teştiler», – qayd ete Skoda Superb saibi.
Evel işbu rayonda böyle vaqialar yüz bermey edi.
Skoda Superb saibi aytqanı kibi, noyabr 9 künü, politsiyağa muracaat etmek niyetindedir.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.