ATR telekanalınıñ saibi Lenur İsâlmov noyabr 2 künü Rusiye mahsus hızmetleri tarafından şirketlerinde, Qırım ve Moskva evlerinde keçirilgen tintüvlerni izaatlap, bu areketler Qırım qamaçavı boyunca vatandaşlıq aktsiyasını toqtatmaz dep ayta.
Bu aqta o Qırım.Aqiqat Radiosınıñ saba efirinde bildirdi.
«Tintüvler ya da daa bir şeynen bizni qorquzmağa mümkün degil. Bir vaqıtları mında yaşağan ve ileride de yaşaycaq qartana ve qartbabalarımıznı qorquzıp olamağanları kibi. Faydasız ikâye», – dey o.
O böyle areketlerge azır olğanını qayd etti.
«Bütün bunı yapmağa başlağanımda buña azır edim. Çünki ruslar ile olğan çeşit «añlaşmalar»nıñ neticesi olmay, tek qırımtatarlarda degil, dünya boyunca neticeleri kimsede olmay. Nafile. Rusiye ile añlaşmalarğa kâğıt bile yazıq», – dedi İslâmov efirde.
Evel noyabr 2 künü Qırımda ATR telekanalınıñ hadimleri, İslâmovnıñ ana-babasınıñ evinde ve Moskvadaki oğlu yaşağan evinde keçirilgen tintüvler aqqında bildirilgen edi. Birazdan tintüvler İslâmovnıñ bütün şirketlerinde FSB tarafından oña nisbeten açılğan cinaiy işniñ çerçivesinde keçirilgeni aqqında malümat peyda oldı.
İslâmovnıñ fikrine köre, işbu areketler – onıñ Kremlge qarşı mevamınıñ neticesi ve onıñ tarafından teşkil etilgen Qırım qamaçavına cevaptır.
Rusiye Merkeziy bankı saytında ATR telekanalınıñ saibi, iş adamı Lenur İslâmovnıñ «Just Bank» şirketiniñ bank ameliyatlarınıñ keçirilmesine litsenziyanıñ qaytarılması aqqında malümat peyda oldı.
Şimdi İslâmov qıtaiy Ukrainada yaşay ve sentâbr 20 künü başlanğan Qırım qamaçavınıñ teşebbüsçilerinden biri ola.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.