Qırımnıñ rusiyeli ükümetiniñ baş nazir müvini Ruslan Balbek Aqmescitte «acele» yardımğa etilgen ücüm eticesinde elâk olğanlar ile vedalaşuv merasiminde yarımada sakinlerini muqayt olmağa çağırdı, haber ete Qırım.Аqiqat mühbiri
«Qatilniñ millet ve dini yoq. O cezalanmalı. Vatandaşlarğa muracaat etemiz, muqayt oluñız, erkekni körseñiz, politsiyağa bildiriñ», – dey o.
Qırım.Aqiqat mühbirine «acele» yardımınıñ aydavcısı Eskender bildirgeni kibi, o vaqıt çalılarda saqlanıp, canını qurtarıp oldı.
«İstiraat evinde otura edim, maşina kelgenini eşittim. Feldşer turıp, qarşılamağa çıqtı, hastanı ketirdiler, dep belledi. Atış, feryatnı eşitem. Baqsam, tüfek ile tura, maña atacaq ola. Qapını aman qapattım, qurşun oña kelip uruldı. Ekinci qattan atladım. Artımdan daa ateş aça edi, hastahane territoriyasından çıqıp, çalılarda saqlandım», – dey erkek.
Onıñ sözlerine köre, ücüm etken adamğa çağıruvlarğa ara-sıra kele ediler.
«Onı körgen edim. Oña bir qaç kere qıdıruvğa kele edik, normal bir erkek edi, sanki. Ne oldı, añlamayım», – dedi erkek.
Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.
Qırımnıñ rusiyeli başı Sergey Aksenov elâk olğan qadınlarnıñ ailelerine ve zarar körgenlerge maliyeviy yardım kösterilecegini vade etti.