Qırımtatarlar sentâbr 20 künü, üylede, Rusiye tarafından işğal etilgen Qırımğa mahsulatnı ketirgen yük maşinalarınıñ areketini blok etmek niyetindeler.
Bu aqta Qırımtatar Milliy Meclisiniñ reisi, Ukraina Yuqarı Şurasınıñ deputatı Refat Çubarov sentâbr 16 künü parlament toplaşuvında bildirdi.
«Sentâbr 20 künü, saat 12:00, Qırımğa erzaqnı ketirgen yük maşinaları içün qıtaiy Ukrainanı Qırım ile bağlağan üç yolnı da qapatcaqmız», – dedi o.
Bunıñ ile Çubarov insanlar ve yengil maşinalar içün iç bir mania olmaycağını qayd etti.
«Aktsiyamız devamlı olacaqtır», – dedi o ve aktsiyağa qoşulmağa çağırdı.
Deputatnıñ sözlerine köre, aktsiya ştabı Qırım ile memuriy sıñırda üç kiriş noqtasından biri yerleşken Çonğarda (Herson vilâyeti) olacaqtır.
Meclis başı şunı da qayd etti ki, qırımtatarlar serbest iqtisadiy zonanıñ işğal etilgen Qırım ile sıñırdaş olğan Herson vilâyetinde teşkil etilmesiniñ tarafdarlarıdır.
Siyasetçi Ukrainanıñ işğal etilgen yarımada ile alâqası meselelerini al etecek qanunlarnı qabul etmege çağırdı.
Ekspertler Qırımğa ukrain malınıñ ketirilmemesi ile bağlı aktsiyanı – qaparcılıqqa cevap olaraq adladılar. Ukrainanıñ icraiy akimiyeti ve prezidenti Petro Poroşenko qırımtatarlarnı Qırım ile memuriy sıñırnıñ qamaçavı ile bağlı niyetlerini izaatlamaylar.