Qırımnıñ rusiyeli ükümetiniñ baş nazir muavini Ruslan Balbek dey ki, yarımada qamaçavı onıñ teşebbüsçilerine ve iştirakçilerine menfiy tesir etecek. Qırım qamaçavınıñ teşebbüsçilerinden biri – Qırımtatar Milliy Meclisi reisi Refat Çubarovnıñ kelecegi ile bağlı tahminlerini memur öz Facebook saifesinde yaza.
«Şunı qayd etmek isteyim ki, biñlerce ukrain iş adamı yalıñız regionımızğa erzaq ketirgenleri sayesinde aqça qazana. Menimce, qamaçavnıñ ilân etilgeninden soñ, iş adamları özleri em Çubarov efendini, em onıñ yeñilmez batalyonını kötekler, bundan soñ olarnı bağlap, Qırım akimiyetine teslim eterler, «serbestlik oğrunda küreşkenler» Ukrainada suvnı bulatmasınlar dep», – yaza Balbek.
Bunıñ ile o, «Qırımğa em ukrain aşayt malları, em de ukrain sanayi malı kerek olğanını» tanıdı.
«Amma olarsız da dayanıp olurmız. Bazı şeylerni tez başqasına deñiştirirmiz, bazı ukrain malından, belki de, tamamınen vazgeçmege kerek olur – yarımadada alış-veriş yapqan iş adamlarına ise büyük qazançtan vazgeçmege kerek olacaqtır», – dey memur.
Çubarovnıñ Balbekniñ sözlerine izaatı şimdilik daa yoqtır. Yaqında Meclis başı Qırım ile memuriy sıñır Hersonda sentâbr 20-21 künleri qapatılacağını bildirgen edi.
Hatırlatamız, qırımtatarlarnıñ yetekçileri Qırım ile memuriy sıñırnı blok etip, işğalci yarımadağa ukrain malınıñ ketirilmesini toqtatmaq niyetindeler. Qırımtatar halqınıñ milliy yetekçisi Mustafa Cemilev aytqanı kibi, «Ukraina Qırmınıñ işğalci rejimini temin etmemeli».