«Qırım cemiyeti» cemaat teşkilâtınıñ Geniçeskteki temsilciliginiñ başı, Geniçesk Meclisiniñ azası, türkşınas Nariman Ablâzov şeerniñ bazı soqaqlarınıñ adlarını Qırım hanlarınıñ adlarına deñiştirmege teklif etti. Bunı o Qırım.Aqiqatqa bildirdi.
Nariman Ablâzov Geniçeskniñ eki soqağınıñ adlarını bu şeerniñ peyda oluvına alâqası olğan eki hannıñ adlarına deñiştimerege teklifi ile buyurdı.
«Dekommunizatsiya aqqında qanunğa köre, şeerimizde soqaqlarnıñ adlarını deñiştirmege başladılar. Biz, qırımtatarlar – bu topraqnıñ tamır halqı, şeerniñ bazı bir soqaqlarına qaramanlarımıznıñ adlarını bermege aqqımız bar. Asabalığımız. Tarihımızdır. Türkşınas olaraq ecdatlarım mında 1000 yıllarca yaşağanını ayta bilem», – dedi qırımtatarlarnıñ yerli cemiyetiniñ başı.
Şeer şurası yerleşken Krasnoarmeyskaya soqağına Sahib Geraynıñ adını bermege teklif etti.
«Ğayet belli han, Qırım hanlığınıñ şimaliy sıñırında bir çoq inşaat qurğandır. Şu cümleden, Herson yanında, Kahovkada. Söz sırası, şunı aytmaq isteyim ki, em Kahovka, em Herson qırımtatar kermenleri edi, çar Rusiyesi olarnı zapt etip, adlarını deñiştirdi», – dey Nariman Ablâzov.
Kuybışev ve 9 yanvarâ soqaqlarına Muhammed Geray Han adını bermege teklif etti.
«O, öz esabına, ileride şeerni meydanğa ketirgen ve adını bergen Cenişke kermenini qurğan edi», – dep qoştı türkşınas.
Ablâzov şunı tarif etti ki, teklifni o yaqında ОSCE ve Geniçesk rayon devlet memuriyeti temsilcileriniñ iştiraki ile keçken tögerek masa devamında seslendirgen edi. Birazdan o, işbu soqaqalarnıñ sakinleri ile muzakerlereni keçirecek şeer şurasınıñ iş komissiyasında iştirak etecektir.