Kefe civarında Gasfort dağında yerleşken Sardin qırallığı askerleriniñ mezarlığı sentâbr 11 künü Qırımda Rusiye prezidenti Vladimir Putin ve onıñ italyan dostu, sabıq baş nazir Silvio Berlusconiniñ ilk ziyaret etken yerleri oldı.
Putin ve Berlusconi 1855 senesi Aqyar rayonında halqara koalitsiya erkânında Rusiye ordularına qarşı cenkleşken Sardin qırallığınıñ eki biñden ziyade asker defn etilgen memorialğa gülçemberlerni qoydılar.
Bundan soñra Putin ve Berlusconi Yalta şeerine ait olğan Massandra qasabasına baracaqlar. Anda «yemek ve degustatsiya» olacaq.
Berlusconi Putinge «şahsiy ziyaret» ile kelgendir. Bundan evel eki kün musafir Rusiyeniñ Soçi kurortında bulundı. Sentâbr 9 künü Kreml spikeri Dmitriy Peskov aytqanı kibi, bu eki erkeniñ «eski iş ve şahsiy munasebeti» bar. Berlusconi İtaliyağa sentâbr 13 künü qaytmalı.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.