Cuma künü, avgust 28-de, Taqiqat komiteti Qırımda «fevral 26» işi boyunca yaqalanğanlarğa – Qırımatar Milliy Meclisi reisiniñ muavini Ahtem Çiygoz, eki faali – Ali Asanov ve Mustava Degermencige qabaatnı seslendirecek ola.
Bunı Qırım.Aqiqatqa Qırımtatar Milliy Meclisi reisiniñ birinci muavini Nariman Celâl bildire.
«Beklenilgeni kibi, taqiqatçı üyleden soñ, taqiqat neticelerini nazarğa alıp, muayyen qabaatnı seslendirecek. İmayege iş malümatları ile tanış olmağa aq bereler», – dey Celâl.
O dey ki, bu «işniñ esas basamağı degil, tehnikiy bir şeydir».
Celâl bildirgeni kibi, üçü de şimdi Aqmescitniñ Vaqtınca bulunuv izolâtorında bulunalar.
«İmayeniñ aytqanına köre, bunı adliyeci ve taqiqatçığa izolâtorğa, SİZOğa köre, irişim biraz qolayca olğanı içün yapqanlar. Başqa taraftan, tuvğanları izolâtorğa kelip olamay», – dedi Meclis reisiniñ birinci muavini.
«Fevral 26» işi ne vaqıt mahkemege berilecek kibi sualge Celâl, avdokatqa esaslanıp, «yaqın zamanda olmaz» kibi cevabını berdi.
«İş malümatları ile prokuratura ve imaye tanış olmalı, tek bundan soñ işni mahkemege berecekler», – dey o.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Bundan soñ uquq qoruyıcılar Mustafa Degermenci ve Ali Asanovnı yaqaladılar.