Ankaradaki Bütündünya qırımtatar kongressiniñ İdare şurasına namzetlerniñ muzakere etilmesi vaqtında bazı eyyetlerniñ temsilcileri qıçırıp qonuştılar, ara-sıra vekiller arasında qavğa qopa edi. Bu aqta Qırım.Aqiqatnıñ mühbiri bildire.
Böyleliknen, Kongresste eñ büyük olğan Ukraina ve Qırım eyyeti uzun vaqıt devamında İdare şurasına namzetlerini belgilep olamay edi.
Başta vekiller muayyen namzetler boyunca davalaştı, ya da teklif etilgen namzetler öz istegi ile namzetlikten vazgeçe edi, soñra rey berüv ketişatı boyunca añlaşılmamazlıqlar peyda ola edi.
Bu aqta er kesten ziyade Qırım vekili Ayder İsmailov çorlanğan edi, atta özüne Bütündünya qırımtatar kongressiniñ yañı saylanılğan prezidenti Refat Çubarov ile yüksek edanen qonuşmağa musaade etti.
Neticede vekiller İdare Şurasına Qırım ve Ukrainadan Ervin İbragimov (Bağçasaray, Qırım, Ukraina), Zevcet Qurtumerov (Saq, Qırım, Ukraina), ATR mediaholdinginiñ saibi Lenur İslâmov (Ukraina), Qırımtatar Milliy Meclisiniñ azası Abmecit Suleymanovnıñ (Ukraina) kirmesine rey berdiler.
Romaniya eyyeti ise iç te Kongress prezidiumına namzetlerini öz başına belgilep olamadı. Çubarov namzetlerniñ adlarını yazmaq içün vekillerniñ bu gruppasına kelgende, iştirakçiler özara qavğalaşmağa başladı ve Kongress prezidenti eyyetni qaldırdı.
Как обсуждают кандидатов в президиум Конгресса. делегаты из Крыма и Украины. pic.twitter.com/6A89ymSbWp
— Mustafa (@bizim_qirim) 2 Серпень 2015
Üyle teneffüsinden soñ vekillerge er bir eyyetten İdare şurasına namzetlerni teklif ettiler.
Qırım ve Ukrainadan İbragimov, Qurtumerov, İslâmov ve Suleymanovdan ğayrı, Çubarov Qırımtatar Milliy Qurultayınıñ Teftiş komissiya reisi Ali Özenbaşnıñ namzetini teklif etti.
Türkiyeden: Namık Kemal Bayar, Ümüt Şilit, Mükremin Şahin, Adnan Evren, Celâl İçten.
Orta Asiyadan: Nariman Appazov (Qırğızistan), Vasfiye Aliarova (Qazahistan).
AQŞ: Ayla Bakallı, Rustem Irsay.
Almaniyadan: Ahmet Ozay.
Bulğaristandan: Özgü Nasuf. Erhan Cevcet.
Ğarbiy Avropadan: Ali Emirullayev.
Romaniyadan: Samet Mennan, Ömer Erul.
Litvaniyadan: Adas Yakubauskas.
Poloniyadan: Nedim Üseinov.
Vekiller teklif etilgen namzetlerge bir ağızdan qol tuttılar.
Bütündünya qırımtatar kongressi Türkiye paytahtı Ankarada avgust 1-2 künleri keçe. Bazar künü vekiller qırımtatar halqı ve halqara teşkilâtlarğa muracaatnı qabul ettiler.