Ankarada keçirilgen Bütündünya qırımtatar kongressiniñ prezidenti vazifesine namzetler muzakere etilgende, vekillerniñ bir qısmı qırımtatar halqınıñ yetekçisi, Ukraina prezidentiniñ qırımtatar halqınıñ işlerinden vekâletlisi Mustafa Cemilevni teklif ettiler, haber ete Ankaradan Qırım.Aqiqat mühbiri.
Şu cümleden, «Qırım» hayriye fondunıñ başı Riza Şevkiye Qırımda qırımtatar halqınıñ Cemilevge qol tutqanını qayd etti, şunıñ içün o Bütündünya qırımtatar kongressiniñ prezidenti olmaq kerek eken.
Vekiller, birdemligini kösterip, el çırpmağa ve «Mustafa!» dep qıçırmağa başladılar.
Mustafa Cemilev qarşı çıqtı ve prezident vazifesine Bütündünya qırımtatar kongressiniñ şimdiki prezidenti, Meclis reisi Refat Çubarovnı teklif etti.
«Bu vaziyette Kongress prezidenti ve Meclis reisi bir insan olmaq kerek», – dedi Cemilev.
O dedi ki, Bütündünya qırımtatar kongressiniñ reglamentine köre, namzetlerden biri saylavdan vazgeçse, onıñ namzeti avtomatik sürette alına.
«Bu muzakere etilmez bile, şunıñ içün Çubarovnıñ namzetini teklif etem. Mustafa Cemilevde itibar barmı, yoqmı, müim degil. Mustafa Cemileniñ itibarı er vaqıt Kongress prezidenti yanında olacaq, bu vazifede kim de olmasa», – dedi o.
Bundan soñ mikrofonnı qırımtatar milliy areket veteranı Veciye Kaşka soradı. O, Cemilevniñ Bütündünya qırımtatar kongressiniñ prezidenti olmağa istemegeni sebebinden öz hoşnutsızlığını bildirdi.
«Biz nice yıllar devamında: «Mustafa ağa» qıçırdıq. Ne içün bu ağır vaqıtta siz bizni yetim kibi taşlaysız? Halq bu vazifede sizni körmege istey», – dedi Kaşka.
Amma Cemilev kene prezident olmağa istemedi ve Çubarovnıñ namzetini teklif etti.
Bundan soñ Türkiye vekili Namık Kemal Bayar sözge buyurdı: «Öyle alda, Mustafa ağa bizim ürmetli prezidentimiz ve başımızda tac olsun, biz ise Çubarovnıñ namzetine qol tutmağa azırmız».
Qırım.Aqiqat mühbiri bildirgeni kibi, vekiller bu teklifni zevqsız qabul etti.
Bir sıra çıqıştan soñ vekillerge daa bir namzet teklif etildi – Meclis reisiniñ muavini Aslan Ömer Qırımlı.
Neticede, vekiller prezident vazifesine eki namzet içün rey berdi: Çubarov ve Qırımlı.
Refat Çubarov (ortada)
Vekillerniñ qararı ile rey berüv açıq edi. Refat Çubarovğa 260 vekil qol tuttı, Asalan Ömer Qırımlıga – 60.
Böyleliknen, Bütündünya qırımtatar kongressiniñ prezidenti Qırımtatar Milliy Meclisiniñ reisi Refat Çubarov oldı.
Rusiye yarımadanı işğal etken soñ 2014 senesi fevral 27-den bugünki künge qadar 15 biñ qırımtatarı Qırımnı terk etmege mecbur oldı. Qırımtatar halqı liderleriniñ Qırımğa kirişleri yasaq etildi, demokratik yollar vastasınen saylanğan ve bütün dünyada yerli halqlarnıñ idare organlarınıñ örnegi olğan – Qırımtatar Milliy Qurultayı ve Meclisi – faaliyetlerini devam ettirmek imkânından marum qaldılar, olarnıñ mal-mülki ise musadere etildi.
İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.