II Bütündünya qırımtatar kongressiniñ vekilleri Ankarağa Qırımda yaqalanğan Qırımtatar Milliy Meclisiniñ reisi muavini Ahtem Çiygoznıñ portreti ve inglizce yazılğan «Ahtem Çiygozğa üriyet» şiarı ile futbolkalarnı kiyip kelmekte.
Qırım.Aqiqat mühbiri bildirgeni kibi, cuma künü üyleden soñ Türkiye paytahtına Kiyevden eyyetniñ esas qısmı ile uçaq keldi, aynı şu uçaqta Kongressniñ prezidenti, Meclis reisi Refat Çubarov da kelgendir.
Eyyet erkânına ATR mediaholdinginiñ başı, iş adamı Lenur İslâmov, Meclis reisiniñ Türkiye boyunca keñeşçisi İsmet Yüksel kire.
Aqşamğa yaqın Ankarağa qırımtatar halqınıñ yetekçisi, Ukraina prezidentiniñ qırımtatarlarnıñ işlerinden vekâletlisi. Ukraina halq deputatı Mustafa Cemilevniñ kelmesi beklenile.
İyül 30 künü Ankarağa Rusiyeden Moskva Qırımtatar cemiyeti idaresiniñ başı, yazıcı Erik Kudusov keldi.
Kongress avgust 1 – 2 künleri Bilkent muafirhanesinde keçirilecek.
Rusiye yarımadanı işğal etkeninden soñ, 2014 senesi fevral 27 kününden ve bugüngece, 15 biñ qırımtatarı Qırımnı terk etmege mecbur oldı. Bunıñ ile qırımtatar halqınıñ yetekçilerine Qırım kirişi yasaqlandı, qanuniy sürette saylanılağan ve bütün dünyada tamır halqlarınıñ öz-özüni idare etüv organlarınıñ nümünesi olğan Qırımtatar Milliy Qurultayı ve Qırımtatar Milliy Meclisi işine devam etmek imkâniyetinden marum qaldılar.
İşbu vaziyetni nazarda tutıp, II Bütündünya qırımtatar kongressini Türkiye paytahtı – Ankarada keçirmek kibi qarar alındı. Ankarada qırımtatarlarnıñ eñ büyük diasporası yaşamaqta.
Aqmescitniñ Kiyev rayon mahkemesi iyül 28 künü Çiygoznı 2015 senesi noyabr 19-na qadar apiste qaldırdı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.