Cumaaqşamı künü, iyül 23-te, aqşam Frenkistan deputatlarınıñ gruppası Qırımğa keldi. Qırım parlamentiniñ matbuat hızmeti bildire ki, deputatlarnı Aqmescit ava limanında Qırımnıñ Rusiye Devlet şurasınıñ reisi Vladimir Konstantinov, onıñ birinci muavini Konstantin Baharev ve prezidium azası Yefim Fiks qarşıladılar.
«Qırım Cumhuriyeti ve Aqyar Rusiye Federatsiyasına subyektler olaraq kirgen soñ yarımadağa Frenkistan Cumhuriyeti parlamentiniñ tışqı işler komissiyasınıñ reisi Tyerri Mariani yolbaşçılığında Frenkistan deputatları gruppası ilk sefer keldi», – dep qayd etti matbuat hızmeti.
Eki künlik ziyaret çerçivesinde Frenkistan deputatları Qırımnıñ şimdiki yolbaşçısı Sergey Aksenov, daa bir kere – Konstantinov ile, Aqyarnıñ şimdiki yolbaşçısı Sergey Menâylo ile körüşecekler.
Bundan ğayrı, programmada Yalta ve Aqyarnıñ müzey kompleksleriniñ ziyareti, deñizge yaqın şeerlernen tanış oluv, yarımada sakinleri ve musafirlerinen subetler olacağı qayd etildi.
Malüm olğanı kibi, Frenkistan parlamentiniñ reisi Klod Bartolon senatorlarğa memleketniñ qanun çıqarıcı organı adından çıqışta bulunmağa yasaq etti, Senat reisi Jerar Larşeniñ yardımı ile eki deputat ziyaretten vazgeçti.
Frenkistan Tışqı işler nazirligi mezkür ziyaretni halqara uquqnıñ bozulması olaraq tanıdı.
Ukraina Tışqı işler nazirligi, deputatlarnıñ Qırım ziyareti ukrain tarafı ile muzakere etilmegenini ve aqibetleri olacağını bildirdi.