Yuqarı Rada Ukraina Anayasa mahkemesine Anayasağa detsentralizatsiya (ademi merkeziyet) meselesinde deñişmelerniñ qanun leyhasını yolladı.
Prezidentniñ №2217a qanun leyhasına, eñ azından 226 deputatnıñ reyi kerek olğanda, 288 deputat qoltuttı. «Radikalnaya partiya» fraktsiyası rey bermedi, «Samopomiç» fraktsiyasından bir rey oldı.
Deputatlar Anayasa deñişmeleriniñ qanun leyhasını Anayasa mahkemesine tasdıqlanması içün yollamaq kerekler.
Qanun leyhasına binaen, yerli cemaat özü bergi toplaycaq ve bücetni belgileycek. Vilâyet ve rayon memuriyetleri – yoq etilecek, devlet valiler institutı ile temsil etilecek.
Ukraina prezidenti Petro Poroşenko rey berüv ögüne çıqışta bulunıp, Donbass içün ayrı bir status olmaycağını ayttı.
«Leyha Donetsk ve Lugansk vilâyetleriniñ ayrı memuriy-territorial yerlerinde yerli idare hususiyetleri ola bilecegini belgiley», – dep qayd etti Poroşenko.
Onıñ bildirgenine köre, işbu qanun parlamentniñ eski ve bu çağırılışları ile eki kere qabul etilgen edi.
«Eminim, teklif etilgen norma Minsk añlaşmalarınıñ sıñırından çıqmay, Rusiye istilâsı zamanında Ukrainağa qoltutqan küçlü dünya koalitsiyasını temin etken bütün dünya, Birleşken Milletler Teşkilâtınıñ Havfsızlıq Şurası, iş ortaqlarımız Minsk añlaşmalarını siyasiy-diplomatik barışıq içün alternativasız temel olaraq tanıdılar», – dep qayd etti o.
Anayasa mahkemesi qarar çıqarğan soñ qanun leyhası tekrar parlamentke qaytacaq, onıñ qabul etilmesi içün eñ azından 300 rey lâzim. Devlet reberligi deputatlarnıñ mezkür qanunnı keçirilmesi oktâbr 25-ke planlaştırılğan yerli saylavlarğa qadar qabul etmesini istey.
Separatistlerniñ bildirgenine köre, Ukraina prezidenti Petro Poroşenko teklif etken Ukraina Anayasası deñişmeleriniñ qanun leyhası Minsk añlaşmalarına uymay.
«DNR» gruppirovkasınıñ vekili Denis Puşilinniñ aytqanına köre, Kiyev Minsk añlaşmalarına emiyet bermeyip, anayasa islâatını «DNR» ve «LNR» yolbaşçılarınen muzakere etmedi ve «Donbassnıñ ayrı statusınıñ qanun seviyesinde tasdıqlanmasını» temin etmedi.