Aqmescitniñ Gagarina bağçasında bu daqqaları qırımtatar bayrağı kününe bağışlanğan tedbirler keçe.
Qırım.Aqiqat mühbiri bildirgeni kibi, esas programma Gagarin bağçasında «Tri gratsii» abidesi yanında saat altıda başlandı. Territoriya demir qoruları ile sarıp alınğan. İçeri kirmek içün metallodetektorlardan keçmek kerek.
Bağçada qoyulğan sanada çeşit taqımlar çıqışta buluna. Bunıñ ile olardan birisi «Kalinka-malinka» rus halq oyunını icra etti. Bayram Qırımtatar Milliy Bayraq kününe bağışlanğanına baqmadan mında Rusiye bayraqlarınıñ sayısı da çoqtır.
Resmiy şahıslardan tedbirde Qırım Devlet şurasınıñ spiker muavini Remzi İlyasov, Qırım musulmanlarnıñ müftisi Emirali Ablayev ve digerleri iştirak ete.
Saat 20:00 yaqın bayram keçirilgen yerde küçlü yağmur başlandı. Toplanğanlar, 150-200 insan, ketmege ya yağmurdan saqlanmaq içün yerlerni qıdırmağa başladı. Böyle yerlerden biri cumhuriyet başı Sergey Aksönovnıñ adından azırlanılğan iftar çadırı oldı.
Bundan da ğayrı, ava şaraitlerinden sebep teşkilâtçılarnıñ kökke ava balonında qırımtatar bayrağını kötermek planları bozuldı. İşbu bayraqnı büyükligi içün Aqmescit rekordlar kitabına kirsetecek ediler. Büyük ketenni kökke köterip olamadılar, tezden gölge tüşip qaldı.
Şimdi tedbir iştirakçileri qırımtatar bayrağını suvdan çıqarmağa tırışalar. Keten ıslanıp, pek ağır oldı, kötermege imkân körünmey.
Bazıları bunda bir menfiy alâmetni köreler. «Bugün ava ağlay, qırımtatar bayramını qayd etip olamaymız», – dedi qadınlardan biri.
Belli ki, tedbirniñ Gagarin bağçasında keçirilüv teşkilâtçıları – Rusiye tarafdarı olğan qırımtatar cemaat teşkilâtları oldı. Evel bu bayramnı keçirgenlerge bu sene böyle imkân bermediler.