Aqmescitte iyün 18 künü SİZOdan Qırım müftisi Emirali efendiniñ kefaleti ile azat etilgen ATR telekanalınıñ operatorı Eskender Nebiyev jurnalistlerge öz teessuratlarını bildirdi.
«Azatlıqta olğanımndan eyecan duyam. Bu birden körünmese de, içimde yanıp taşam. Men, ğaliba, bu er şeyden daa çoq vaqıt devamında keyf sürecem – küneş, yapraq, adiy insaniy yaşayış», – jurnalistlerge aytqan birinci lafı.
O, apiste keçirgen bu eki ayı aqqında da qısqadan tarif etti.
«Bu ayatqa pek tez alışasıñ, künler pek uzun körüne, men bu künni (azat bıraqılmasını) pek bekledim», – dedi operator.
Advokat Cemil Temişev aytqanı kibi, Eskender Nebiyev mahkemege qadar Qırım boyunca serbest areket ete bile, amma talap etilse, taqiqatçı ve prokurorğa kelmek kerek olacaq.
Nebiyeniñ apisten azat etilmesi aqta iyün 18 künü ATR telekanalınıñ baş müdir muavini Lilâ Bucurova bildirdi.
2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.