ATR qırımtatar telekanalınıñ yayınlavı sputnikte ğayrıdan pektilgeni ile, Ukraina Haber siyaseti naziriniñ keñeşçisi Sergiy Kostınskıynıñ firkine köre, «Qırımnıñ mustaqil matbuat vastaları pozitsiyalarını qaytarmağa başladı».
Bu aqta o Kiyevde iyün 18 künü ATR yayınlavınıñ yañartuvına bağışlanğan konferentsiyada ayttı.
«ATR yayınlavınıñ yañartıluvı – Ukraina içün ciddiy sınav ve söz serbestligi yolunda biz bu sınavdan keçip oldıq. Şimdi biz qırımtatar halqı kene tuvğan tilinde yayınlavğa irişimni elde etkeni aqta ayta bilemiz. Qırımnıñ mustaqil matbuat vastaları niayet pozitsiyalarını qaytarmağa başlağanı aqta ayta bilemiz», – dey Kostınskıy.
O şunı da qayd etti ki, ukrain haber nazirligi telekanalnıñ qıtaiy Ukrainada çalışuvı içün oñaytlı şaraitlerni teşkil eter eken.
ATR yayınlavınıñ yañartuvı aqqında iyün 17 künü belli oldı, çarşenbe künü aqşam telekanal efirini Bağçasaray Han sarayında gimnniñ icrasından başladı. «Lâle» bala telekanalı da işke devam etti.
Qırımnıñ rusiyeli akimiyetinden bu aqta izaatı daa yoqtır.
Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. ATR qapatılğan soñ cumhuriyetniñ akimiyeti cemaat qırımtatar telekanalını açmağa teklif etti. Olarnıñ fikirince, qırımtatarlar kerçek malümatnı almaq aqqını qullanacaqlar.