Yarımadada iyün 12 künü furtuna havfı saqlanıla. Qırım Fevqulâde işler Nazirliginde Qırım paytahtı sakinlerini bugün areketini sıñırlamağa çağıralar.
«Ava şaraitleriniñ beterleşüvi, yelniñ artması, sağanaqnıñ olması sebebinden Aqmescit memuriyeti şeer boyunca areketni sıñıralamaq rica ete», – denile Aqmescitniñ şeer memuriyetiniñ beyanatında.
Qırım.Aqiqat bildirgeni kibi, iyün 9-da aqşam yağğan sağanaq neticesinde Aqmescitniñ merkezi suvğa battı, yollar tam bir özenlerge çevirildi, aydavcılar maşinalarnı taşlap ketmege mecbur ediler.
Küçlü yağmurdan soñ bazı yollarnıñ asfalti yoq oldı.
Qırımnıñ şimdiki yolbaşçısı Sergey Aksenov iyün 10-da bergen malümatına köre, yaqın vaqıtta şeerniñ sağanaq kanalizatsiyasını tüzetmek imkânsız. O, kommunal hızmetlerniñ keyfiyetsiz işini qayd etti.
Aksenov mal-mülki zarar körgen sakinlerden afu soradı.