Qırımda Aqmescitniñ Franko soqağındaki Federal havfsızlıq hızmeti (FSB) binası yanında iyün 4-te Aqmescit rayonınıñ Mamaq (Stroganovka) köyünde yaqalanğan Riza İzetovğa qoltutmağa kelgen 12 insan yaqalandı.
İnsan aqları Qırım alan missiyasınıñ Qırım.Aqiqatqa bergen malümatına köre, politsiya hadimleri adamlarnı şahsiyetlerini belgilemek içün yaqaladılar ve Qırım İçki işler nazirliginiñ Kiyev rayon bölügine ozğardılar.
Uquq qorçalayıcılarnıñ qayd etkenine köre, adamlarnıñ yanında vesiqaları bar edi. Yaqalanğanlarğa adliyeci Emil Kürbedinov ile körüşmege izin berdiler.
Qırımtatar milliy areketiniñ faali, Qırımtatar Milliy Qurultayı Merkeziy saylav komissiyasınıñ reisi Zair Smedlâyev iyün 4-te Aqmescit civarında daa bir qırımtatarı Riza İzetov yaqalanğanını bildirgen edi.
Qırım uquq qoruyıcılarınıñ resmiy izaatları daa yoq. Ukraina Tış işler nazirligi Birleşken Milletler Teşkilâtını Qırımda insan aqlarınıñ bozulmasını tam bir şekilde qayd etmege çağırdı. Qırımnıñ Rusiye akimiyeti insan aqlarınıñ bozulmasını red ete. Bu künleri Rusiye Tış işler nazirligi qırımtatar meselesini siyaset ile bağlamamağa çağırdı.