Qırımtatar Milliy Meclis reisi, Ukraina halq deputatı Refat Çubarovğa Aqmescitniñ Kiyev rayon mahkemesine celpname keldi. Bunı Çubarov iyün 3 künü öz Facebook saifesinde yazdı, haber ete Qırım.Aqiqat.
Onıñ sözlerine köre, onı Rusiye Federatsiyası Cinaiy Kodeksiniñ 33-ünci madde 3 qısmı (cinayet teşkilâtçısı) ve 30-ıncı madde 3 qısmı (cinayetke suiqast), 105-inci madde 2 qısmı «j», «z» maddeleri (bir qaç şahıs tarafından yapılğan öldürüv), 222-nci madde 1 qısmı (silânıñ qanunsız satın aluvı, saqlanılması ve teslim etilmesi) boyunca «şaat olaraq» davet eteler.
Şusı meraqlı ki, celpname evel Yevromaydan faali Aleksandr Kоstenkonı 4 yıl ve 2 ay apis cezasına maküm etken mahkemeci adından keldi.
«İşbu celpnamege köre, men «Aqmescit şeeri Kiyev rayon mahkemesiniñ mahkemecisi Viktor Mojelânskiyge kelmek kerekim», mahkemeci – işğal etilgen Qırımda ceza bericilerniñ sırasına öz istegi ile kirgen satqınğa. Şunı qayd eteyim ki, aynı şu mahkemeci – cellât 2015 senesi mayıs ayında Aleksandr Kоstenkoğa, Yevromaydan iştirakçisine, 4 yıl 2 ay apis cezasını maküm etti», – dey Çubarov.
«Eminim, künlerniñ birinde epimiz, «prokuror Nâşa», «mahkemeci – zalım Mojelânskiy Viktor» ve Rusiye işğalcilerine yardım etkenlernen Qırımda körüşirmiz. Vatanını satqan, antından vazgeçken «adliyeciler» satqınlıq ve bugün yapqan cinayetlerinden sebep adaletli cezadan qaçamaz», – dedi o.
Qırımda Rusiye Federal havfsızlıq hızmeti (FSB) idaresiniñ taqiqat bölügi Qırımtatar Milliy Meclis reisine qarşı cinaiy işni açtı. Bunı Qırım prokurorı Natalya Poklonskaya bildirdi. Onıñ sözlerine köre, cinaiy iş devletniñ topraq bütünliginiñ bozuluvına çağıruvları ile bağlı.
Evel Çubarovğa Rusiye territoriyasına, şu cümleden işğal etilgen Qırımğa kirişi beş yılğa yasaq etildi.