Qırımnıñ büyük şirketleri yarımadanıñ sport federatsiyalarına maliyeviy destek kösterecek, dedi Qırmınıñ Rusiye başı Sergey Aksönov.
Bunı Qırım Rusiye ükümetiniñ matbuat hızmeti bildire.
Aksönovnıñ sözlerine köre, Qırım sport federatsiyalarına maliyeviy yardımını «Çernomorneftegaz», «Krımgazseti» ve «Krımenergo» özüne alacaq.
«Olarnı resmiy şekilde mesüliуetli etermiz. Qırımnıñ sport komandalarına ayaqqap alır, kiyndirir. Böyleliknen biz Qırım komandalarınıñ er bir yarışta iştirakini 100% temin etermiz», – dedi o.
Rusiye Devlet duması 2014 senesi iyül 1 künü Qırımnıñ sport tertibatını Rusiye uquqiy alanına kirsetecek qanunnı qabul etti. Bunıñ ile halqara sport cemiyetleri Qırımnıñ işğalini tanımay.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.