Qırım işğali devamında tahminen 35 biñ qırımlı yarımadanı terk etmege mecbur oldı. Olardan yigirmi biñden ziyade qırımtatarlardır.
Bunı qırımtatar halqınıñ milliy lideri, Ukraina halq deputatı Mustafa Cemilev Radio Svobodağa ayttı.
«Bütün Ukrainada qırımtatarlar yerleşkenini aytmaq mümkün. Amma esasen ğarp vilâyetlerinde – Lviv, Vinnitsa – anda daa hoş qabul eteler», – dep qayd etti o.
Mustafa Cemilevniñ aytqanına köre, Qırımtatar Milliy Meclisi semetdeşlerini Qırımnı terk etmemege çağıra, çünki Rusiye akimiyeti bunı bekley.
2015 senesi mayıs ayınıñ başında Ukraina içtimaiy siyaset nazirligi Qırım ve Donbasstan köçip kelgen 1,26 million insan aqqında bildirgen edi.
Your browser doesn’t support HTML5
İşğalciler qırımtatar bayraqlarına dayansa da, Ukraina bayraqlarına razı degiller - Cemilev
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.