Ukraina Yuqarı Radasında 2015 senesi mayıs 13-te qırımtatar halqınıñ aq-uquqları ve serbestligini bozuv ile bağlı Birleşken Milletler Teşkilâtı, Avropa Parlamenti, Avropa Şurasınıñ Parlament Assambleyası, OSCE Parlament Assambleyası, dünya liderleri ve halqara toplulıqnıñ bütün azalarına muracaat aqqında qarar leyhası qayd etildi.
Vesiqa teşebbüsçileri ve müellifleri halq deputatları gruppası, şu cümleden qırımtatarlarnıñ milliy lideri Mustafa Cemilev olalar.
«Qarar leyhasınıñ maqsadı Ukraina tarafından tamır halq olaraq tanılğan qırımtatarlarnıñ aq-uquqlarınıñ bozulmasına yol bermemek ve halqara toplulıqnıñ diqqatını bu problemge celp etmek», – dep aytıla qararnıñ tezkeresinde.
Muracaatnıñ esas maddelerinde al-azırda Rusiyeniñ nezareti altında qalğan yarımadada qırımtatarlarnıñ aq-uquqlarını bozuvnı takbih etmek, qırımtatarlarnıñ taqip etilmesi ve ayırımını toqtatmaq çağıruvları mevcut. Qarar halqara toplulıqnı çette qalmamağa çağıra.
Qırımtatar Milliy Meclisiniñ reisi Refat Çubarov ukrain parlamentiniñ yaqın toplaşuvında qarar qabul etilecek, dep ümüt ete.
Mayıs 13-te Ukraina Tış işler nazirligi aydınlatqan Tış işler nazirleri seviyesinde Ukraina-NATO Komissiyasınıñ beyanatında Rusiyeni Qırımnıñ yerli ealisiniñ aq-uquqları ve serbestligine sayğı köstermege, em de yarımadada insan aqları vaziyetini halqara seviyede nezaret etmek imkânını bermege çağırdılar.
Halqara uquq qorçalayıcı teşkilâtlar Qırımda insan aqlarınıñ bozulması ve basqı aqqında bir çoq kere aytqan ediler. Qırımnıñ Rusiye akimiyeti bunı sebepsiz, bazı malümatlarnı ise yañlış, dep tanıy.