Krasnodar ülkesiniñ mahkemesi qırımtatarlarnıñ milliy lideri Mustafa Cemilevniñ oğlu Hayserniñ mahkemesini adliyeci hasta olğanından sebep başqa künge qaldırdı.
Bunı Hayser Cemilevniñ adliyecisi Nikolay Polozov özü Twitterde bildirdi.
Onıñ malümatına köre, mahkeme mayıs 19-da ötkerilecek.
«Hastalığımdan sebep Hayser Cemilevniñ işi boyunca mahkeme 19.05 kününe qaldırıldı. Amma bugün kelmege ep bir mecbur oldım», – dep yazdı o.
TASS Rusiye agentligi bildire ki, Hayser Cemilevniñ imayesi mahkemege eñ azından daa üç şaatnı çağıracaq.
«İşte qabaat tarafınıñ 20 şaatı bar ve imayeniñ yalıñız bir şaatı bar, bunıñ içün ateş açılğan vaqıtta yanında olğan bir qaç adamnı çağırmaq kerek: qomşular, em de mahküm etilgenniñ dostu», – dep ayttı agentlikke adliyeci.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.
Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.
Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.