Ukraina prezidenti Petro Poroşenko Qırım ve Donbass işğalden azat etileceginden emin. Bunı o, Kiyevde Ulu Vatan cenkiniñ Milliy tarih müzeyinde mayıs 8-de aqşam Hatıra ve barışıq Kününe bağışlanğan tantanalı merasimlerde çıqışta bulunıp ayttı.
«Ukrainada kene barışıq olacaq. Bunıñ içün elimden kelgeni qadar yapmağa söz berem. Ve imkânsız olğan şeylerni de yapacam. Eminim, yeñermiz, çünki bizler tuvğan ukrain toprağını imaye etemiz. Donbass da işğalcilerden azat etilecek. Qırım da azat etilecek», – dep tekrarlay Poroşenkonıñ sözlerini onıñ matbuat hızmeti.
Petro Poroşenko
Bundan evel, Avropada natsizmni yeñüvniñ 70 yıllığına bağışlanğan Ukraina Yuqarı Radasınıñ tantanalı toplaşuvında Poroşenko Ukraina tarihnıñ sert derslerini aldı, dep qayd etti.
«Bizge Çehoslovakiyanıñ işğali ne olğanını añlatmaq kerekmey, bizde eki vilâyet qısmen işğal etildi – Donetsk ve Lugansk. Bizge Avstriyanıñ işğali ne olğanını hatırlatmaq kerekmey. Bunı bizler Qırım işğalinde kördik», – dedi o.
Bizge Avstriyanıñ işğali ne olğanını hatırlatmaq kerekmey. Bunı bizler Qırım işğalinde kördikPetro Poroşenko
2014 senesi fevral soñunda mart başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ onıñ neticelerini tanıdı ve bunı Rusiye tarafından Qırımnıñ işğali olaraq sayalar. Ğarp Qırım Ukraina olğanını aytmağa devam ete.
Ukraina ve Ğarp Rusiyeni Donbass separatistlerine silâ ve adamlarnen yardım etkeninde qabaatlay. Moskva bu qabaatlarnı red etip, Ukraina şarqında «göñülliler» cenkleşkenini bildire.
AQŞ, Avropa Birligi ve bir sıra biger memleket Qırım işğali ve Moskvanıñ Donbass zıddiyetinde rolünden sebep Rusiyege qarşı cezalar kirsettiler.