Kiyevde baar saçuv işleriniñ başlanmasını ifadelegen «Hıdırlez» qırımtatar milliy bayramını qayd ettiler. Tedbirni Qırımtatar yaşlar merkezi teşkil etti.
Qırım.Aqiqat mühbiri bildire ki, bazar künü, mayıs 10-da, sabadan berli «Nivki» Kiyev bağçasında «Hıdırlez» bayramına azırlıq körmege başladılar. Üylege yaqın mında qırımtatar qorantaları, yerli sakinler ve Qırımdan mecburen köçip kelgenler kelmege başladılar. Bayramğa bir qaç yüz insan keldi.
Bayram ananelerge köre keçirildi. Toplaşqanlar «Haytarma» oynadı, milliy yırlarnı yırladı ve pilâvni pişirdiler. Sport yarışları da teşkil etilgen edi, olarnıñ arasında – Küreş. Balalar Küreşte iştirak ettiler, büyükler ise esas bahşış – qoy – içün küreştiler. Bayram keçirilgen yerde aileler piknik içün sofralarnı donattı, milliy bayraqlarnı açtı, eski tanışlarını kördi ve yañı dostlarnen tanış oldılar.
Qırımtatar Milliy Meclisiniñ reisi Refat Çubarov bayramda çıqışta bulunıp, «işğalde neticesinde tahminen 10 biñ qırımtatarı Qırımnı terk etmege mecbur olpanını» ayttı. O, bu sene mayıs 3-te Qırımda Rusiye akimiyeti «Hıdırlezni» teşkil etkenini ve adamlarnı bayramğa kelmege zorlağanını hatırlattı.
«Anda sovetler zamanına qayttılar – er bir devlet müessisesinde emirler alındı, yerler berildi – eki-üçer adam, er bir bölük yollamaq kerek edi», – dep ayttı Çubarov.
Qırımnıñ Rusiye akimiyeti bildire ki, mayıs 3-te olıp keçken «Hıdırlezde» on biñlernen adam iştirak etti, Refat Çubarov ise iştirakçilerniñ sayısı beş biñden ziyade olmağanını qayd etti.
Qırım.Aqiqat bildirgeni kibi, bir çoq qırımtatarı cumhuriyetniñ akimiyetinen razı olmayıp, Qırım akimiyetiniñ teşebbüsi ile Bağçasaray rayonında keçirilgen «Hıdırlez» bayramına barmadı.
Qırımtatarlar Hıdırlezni Kiyevde qayd ettiler (fotogalereya)