Aqmescit şeer memuriyeti Qırımtatar Milliy Meclisine sürgünlik yıllığına bağışlanğan matem tedbiriniñ keçirilmesini resmiy şekilde yasaq etti. Bunı Qırımtatar Milliy Meclisiniñ matbuat hızmeti bildire.
«Memuriyetniñ cevabında aytıla ki, bundan evel diger qırımtatar teşkilâtı aynı vaqıtta ve aynı yerde tedbir keçirmege planlaştırğanını bildirgen eken», – dep bildire matbuat hızmeti.
Aqmescit memuriyeti yazma cevabında miting keçirilmesi içün başqa yerni teklif etmedi, çünki Qırım Nazirler şurasınıñ Aqmescitte cemaat tedbirleri içün belgilengen boş yerler aqqında tasdıqlanğan qararı yoq
Aqmescit memuriyeti yazma cevabında miting keçirilmesi içün başqa yerni teklif etmedi, çünki Qırım Nazirler şurasınıñ Aqmescitte cemaat tedbirleri içün belgilengen boş yerler aqqında tasdıqlanğan qararı yoq.
Mayıs 5-te Qırımtatar Milliy Meclisi Aqmescitniñ şeer memuriyetine 1944 senesi mayıs 18 künü qırımtatar halqı genotsidi qurbanlarınıñ hatırasına matem mitinginiñ keçirilmesi aqqında haber etkenini bildirgen edi.
Aqmescit şeer memuriyetiniñ başı Gennadiy Baharev bildirdi ki, Aqmescit akimiyeti mayıs 18 künü qırımtatar sürgünliginiñ 71 yıllığı munasebeti ile şeer merkezinde matem mitingini keçirmege izin bermez.
Onıñ aytqanına köre, Lenin meydanında «devlet bayramları munasebeti ile keçirilecek tedbirlerden ğayrı» diger kütleviy numayışlarnıñ keçirilmesi mümkün degil. Baharev şunı da qayd etti ki, yaqında meydan etrafında tamir işleriniñ keçirilmesi içün qora qoyulacaqtır.
Qırım ükümetiniñ baş nazir muavini Ruslan Balbek mayıs 18 künü arfesinde Qırım akimiyeti ve uquq qoruyıcı organları «ukrain siyasetçileri, qırımtatarlarnıñ yetekçileri Mustafa Cemilev ve Refat Çubarov tarafından azırlanğan kütleviy tarikler aqqında malümatnı elde etkenini» bildirgen edi.
Qırım prokurorı Natalya Poklonskaya yarımadanıñ uquq qoruyıcıları «mayıs 18 künü qırımtatar halqınıñ sürgünligi yıllığı ile bağlı olğan tariklerniñ ögüni almağa tırışacağını» bildirdi.
Keçken sene Aqmescitte ananeviy matem mitinginiñ keçirilmesi yasaq etilgen edi.
Aqmescit memuriyeti bergen cevabınıñ kopiyası