Yerli cemaat Eski Qırım (İslâm-terek rayonı) akimiyetiniñ vekillerine muracaat etken soñ şeerniñ yañı musulman mezarlığında qoranıñ yıqmasını toqtattılar. Bu aqqında Qırımtatar Milliy Meclisiniñ Facebook saifesinde aytıla.
Temsil organınıñ malümatına köre, salı künü, mayıs 5-te, bu mezarlıqnıñ meselesi boyunca ükümet komissiyasınıñ toplaşuvı keçirilecek.
İslâm-terek regionınıñ reisi Ekrem Abdulvapovnıñ bildirgenine köre, şeer yolbaşçısı mahkemeniñ qararına esaslana. Mahkeme ise mezarlıqnı kenişletmege izin bermey, rayon yolbaşçısınıñ bundan haberi de yoq.
Qırım.Aqiqat bildirgeni kibi, bazarertesi künü, mayıs 4-te, Eski Qırımnıñ kommunal hızmetleri yañı musulman mezarlığınıñ qorasını yıqmağa başladılar. Eski Qırımnıñ «Vatan» din cemiyetiniñ reisi Rasim Sadredinovnıñ aytqanına köre, şeer şurasınıñ qararı ile musulman mezarlığı içün yer ayırıldı, bütün vesiqalar azır edi. Sadredinovnıñ bildirgenine köre, nezaret organları bu yerniñ topraq altındaki suvlar suv anbarına kete, dep netice çıqardılar.