Qırımda cuma künü, aprel 24-te, Qarasuvbazarda Cuma Caminiñ tantanalı açılış tedbiri olıp keçti. Qurucılıqnıñ teşebbüsçileri ve sponsorları iş adamları ağa-qardaş Resul ve Remzi Velilâyevler oldılar, – dep haber ete Qırım.Aqiqat.
«Bu topraqta tarihiy adalet ğayrıdan tiklenmege başlay, yoq etilgen 22 camiden birini bizler ğayrıdan tikledik», – dep ayttı qurucılıq sponsorlarından biri Resul Velilâyev.
Qarasuvbazarda Cuma Caminiñ açılışı
Cuma Caminiñ tantanalı açılışına 500 insandan ziyade keldi. Davet etilgenler arasında Qırımtatar Milliy Meclisi reisiniñ birinci muavini Nariman Celâl, Qırım baş naziriniñ muavini Ruslan Balbek ve Qırımnıñ Rusiye ükümetiniñ Milletlerara munasebetler ve sürgün olunğan grajdanlarnıñ işleri boyunca Devlet komitetiniñ yolbaşçısı Zaur Smirnov bar ediler.
Camini 33 metrlik eki minare yaraştıra. Caminiñ qubbesini Qırım ustaları bezettiler.
İleride caminiñ yanında medrese qurulması planlaştırıla.