Rusiye Taqiqat komiteti ukrain arbiyi Nadejda Savçenkoğa qabaatını resmiy şekilde aydınlattı. Taqiqat komitetiniñ resmiy temsilcisi Vladimir Markin bildirdi ki, onı eki ve ekiden ziyade şahısnıñ öldürüvine yardım etüv ve sıñırdan qanunsız alda keçüvde qabaatlaylar.
Markinniñ aytqanına köre, eñ yaqın vaqıtta Nadejda Savçenkonıñ cinaiy iş malümatları taqiqatnı yekünlemek, taraflarğa malümatnı ögrenmek ve mahkemege teslim etmek içün berilecek.
Taqiqatnıñ malümatına köre, Ukraina şarqında Rusiye jurnalistleriniñ ölümine alâqası olğanında qabaatlanğan Savçenko sıñırdan keçip, Rusiyede saqlanacaq edi.
Ukrain arbiyi bunı red etip, separatistler onı esir alğan soñ Rusiyege yolladılar, dep bildire. Mında keçken sene yazda onı apiske aldılar.
Kiyev ve ğarp memleketleri Rusiyeden ukrain uçucısını Minsk añlaşmalarınıñ şartlarına esaslanıp azat etmege talap ettiler.
Fevral ayında Moskvanıñ Basman mahkemesi Nadejda Savçenkonıñ apis cezasınıñ müddetini mayıs 13-ke qadar arttırdı. İş taqiqatı da bu müddet qadar arttırıldı. Savçenko 80 kün tutqan narazılıq açlığını ilân etken edi. Mart 16-da o, açlıqqa tekrar başlap, cezasını deñiştirmege talap etti.