Rusiyeniñ Qırımnı inkişaf ettirmek niyeti yoq, eñ yaqın vaqıtta büyük yatırımlar anda yapılmaycaq, yarımadanı Ukrainağa darma-dağın alda keri qaytarırlar, dep tüşüne iqtisadiyatçı, Buhran ile milliy küreş gruppasınıñ reber ortağı Taras Zagorodniy.
Bunı o Kiyevdeki matbuat konferentsiyasında bildirdi.
«Qırımnı bizge qaytarırlar, lâkin o bütünley darma-dağın olacaq. Bizler añlamaq kerekmiz, Rusiye (Sovetler Birligi zamanında – muar.), Königsbergge (Kaliningradğa) yatırımlar 30 yıl devamında yapmadı. Olar bunıñ devamlı olacağından emin degil ediler. Bunıñ soñsuz olacağını 75 senesi añladılar, Helsinkide Avropa sıñınlarınıñ bozulmaması aqqında añlaşma tizildi. O vaqıt yatırım yapmağa mümkün olğanını añladılar, bundan evel ise keri qaytarmaq kerek olacağından qorqqan ediler. Bu sefer (Qırımda – muar.) er şeyni yoq etecekler», – eminliknen ayta Zagorodniy.
Onıñ fikirince, Rusiye reberligi Stalin zamanlarınıñ usullarından faydalanacaq.
«Olar Qırımnı inkişaf ettirmeycekler, Stalinniñ yapqanlarını yapacaqlar: başqa yerge köçürmek içün bu yerde yaşayışnı imkânsız yapacaqlar», – dep qayd etti Zagorodniy.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.