Qırımtatarlar – Ulu Vatan cenkiniñ veteranları Rusiye Federatsiyasınıñ prezidenti Vladimir Putinge muracaatta bulunıp, ATR qırımtatar telekanalına yayınnı ğayrıdan tiklemekte yardım etmege rica ettiler. Bu aqqında Qırım.Aqiqatta olğan Putinge muracaat kopiyasında aytıla.
Muracaatta qayd etile ki, 1990-ıncı senelerinden itibaren qırımtatarlar til, medeniyet ve urf-adetlerini «devlet sayesinde degil, devletke zıt ketip», canlandırdılar. «Böylece, aman-aman 10 yıl evelsi dünyada yekâne olğan ATR telekanalı ve «Meydan» radiosı açıldı, soñra da «Lâle» bala telekanalı peyda oldı. İşbu qırımtatar kütleviy haber vastaları faşizmni yeñgen sovet halqınıñ qarmanlığı, şu cümleden Qızıl orduda hızmet etken qırımtatarlarnıñ cesürligi aqqında sıq-sıq aytqan ediler Ulu Vatan cenkine dair levha ve radio yayınları sayesinde qırımtatarlarnıñ yañı nesili vatanperver olaraq terbiyelendi», – aytıla muracaatta.
«Qırımtatar kütleviy haber vastalarınıñ qapatılması bizim içün, bütün qırımtatar halqı içün de, büyük bir zarar oldı. Torunlarımızğa qırımtatar televideniye ve radiosı kimge keder ete edi sualine nasıl cevap berecegimizni bilmeyik», – dep aytıla muracaatta.
Muracaatnı Qırımtatarlarnıñ cumhuriyet cemaat teşkilâtınıñ reisi, cenkniñ 1 gruppa saqatı Nariman Kazenbaş, 25 Çapayev diviziyasınıñ veteranı Şefika Abibullayeva, Aqyar mudafaasınıñ iştirakçisi Ablâmit İbraimov, gvardiya polkovnigi, cenkniñ 1 gruppa saqatı Reşat Sadretdinov, Stalingrad uruşınıñ iştirakçisi Rustem Memetov, cenk uruşlarınıñ iştirakçisi, cenkniñ 1 gruppa saqatı Üsein Fahriyev, 51-inci ordunıñ terkibinde cenk uruşlarında iştirak etken Ediye Burnaşeva, Aqyar mudafaasınıñ iştirakçisi, cenkniñ 1 gruppa saqatı Hatice İslâmova, Qırım partizanı, cenk uruşlarınıñ iştirakçisi Nariman Memetov, faşistler lagerleriniñ esiri Riza İbragimov, cenkniñ 1 gruppa saqatı Amza Mamutov imzaladılar.
Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı. Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.