Ukraina şarqındaki vaqialarğa bağışlanğan «Cesür yuyerkeler» vatanperver leyhası «Teleyıldız 2014» milliy mukâfatına nail oldı. «1+1» telekanalınıñ resmiy saytında bildirilgeni kibi, programma «Eñ eybetli leyha» namzetliginde ğalebe qazandı.
«Cesür yürekler»ge seyircilerniñ 25% qol tutı. Malüm ki, «Teleyıldız» eykelçigini mukâfat teşkilâtçıları Ahtem Seytablayevge çarşenbe, aprel 15 künü, programmanıñ yañı yayınınıñ çıqarılması vaqtında bağışladılar.
«Pek memnünim! Böyle büyük mukâfatnıñ elde etilmesi pek tesirlidir. Biz, «Cesür yürekler» komandası seyircilerimizge pek minnetdarmız. Amma bu mukâfat ilk nevbette bu ağır vaqıtta Ukrainanı qorçalamağa turğan arbiylerge, göñülli, ekim, analarğa ait. «Cesür yürekler» – insan qaramanlığı aqqında bir programmadır. Ve qaramanlıqnıñ aqiqiy qıymetini biz endi añlamağa başlaymız», – dedi Ahtem Seytablayev.
«Teleyıldız» halq mukâfatı «Telenedelâ» neşiri tarafından teşkil etildi. Ukrainada ilk umummilliy reyting, mında ekspertler rolüni seyirciler icra ete. «Teleyıldız» ğalipleri er yıl rey berüv vastası ile belgilene, rey berüvde on biñlerce seyirci iştirak ete.
Malüm olğanı kibi, «1+1» telekanalında «Cesür yürekler» adlı yañı yayın çıqtı. O, Ukraina şarqındaki vaqialar devamında cesürlikni köstergen adamlarğa bağışlana. Leyhanıñ müellifi qırımtatar rejissörı ve aktör Ahtem Seytablayevdir