Qırımda Rusiye yol areketi telükesizligi inspektsiyasınıñ (GİBDD) hadimleri Rusiye aydavcı şeadetnamesini bergende «ukrain» şeadetnamelerini alalar. Bunı Aqmescit cemaat faali Aleksey Yefremov Vkontakte içtimaiy ağında bildire.
«Arqadaşlar, ukrain şeadetnamelerini bermeñiz, onı qaldırmaq aqqını talap etiñiz (sizge kerek olsa, elbette), çünki GAİ hadimleri olarnı keserler, ve siz olarnı bir daa köremeyceksiñiz», – dep yazdı Yefremov.
Onıñ aytqanına köre, GİBDD vekilleri Rusiye Federatsiyası ükümetiniñ 2014 senesi oktâbr 24-te çıqqan «Naqliyat vastasını qullanmaq izni aqqında» qararına esaslanıp, ukrain şeadetnamelerini qaytarmaylar.
Yefremovnıñ bildirgenine köre, 43-ünci noqtada aytıla ki, Rusiye aydavcı şeadetnamesi berilgen soñ çetel aydavcı şeadetnamesi qaytarıla.
Faal Rusiye İçki işler nazirliginiñ devlet avtoispektsiyasınıñ saytında GİBDD hadimleriniñ areketlerinden şikâyet etti.
Aleksey Yefremovnıñ Qırımdaki GİBDD hadimlerinden şikâyeti
Al-azırda Qırım aydavcıları naqliyatnı ğayrıdan qayd eteler ve Rusiye aydavcı şeadetnamelerini alalar. Rusiye Federatsiyası İçki işler nazirliginiñ devlet inspektsiyası 2015 senesi yanvarniñ soñunda bergen malümatına köre, 205 biñ aydavcı şeadetnamesi berildi ve 177 biñ naqliyat vastası ğayrıdan qayd etildi.