Peterburgda demokratik firqa ve areketler Demokratik yürüşniñ teşkiliy komitetiniñ qurulmasını ilân ettiler. Yürüş mayıs 1-de şeerde keçirilecektir, dep haber ete Radio Svoboda mühbiri.
Mayıs 1-de Peterburgda Demokratik yürüş keçirilmesiniñ teşebbüsçileri «Yabloko» firqası, RPR-Parnas firqası, «Partiya Progressa», «Demokratiçeskiy vıbor» firqası, «Partiya 5 Dekabrâ» ve «Vesna» areketi oldılar.
Körüşüv iştirakçisi, RPR-Parnas firqasınıñ Peterburg teşkilâtınıñ reisdeşi Andrey Pivovarovnıñ aytqanına köre, teşkiliy komitet mart 1-ge keçirilmesi belgilengen aktsiya komitetine esaslandı. O aktsiyanıñ kün tertibi Boris Nemtsovnıñ öldürüvinden soñ deñişti. Bu öldürüvni taqiq etmek RPR-PARNAS firqasınıñ yürüşteki esas talabı olacaq.
«Demokratik muhalifetniñ mayıs 1-de çıqqanı biraz hucurdır, lâkin Nevskiy caddesine çıqmaq yekâne fursatımız bu», – dep ayttı Andrey Pivovarov.
Körüşüvniñ diger iştirakçisi, «Yabloko» firqasınıñ Peterburgtaki reisi Andrey Paleviç bildirdi ki, «Yabloko» firqası içün esas mevzu Ukraina ile cenk qala, çünki iqtisadiyattaki buhran meseleleri – bu cenkniñ aqibetleridir.
Cuma künü, aprel 10-da, teşkiliy komitetniñ toplaşuvı keçirilecek. Tedbirde yürüşniñ mevzuatı ve şiarları, iştirakçilerniñ talapları ve aktsiyanıñ formatı belgilenecek. Demokratik yürüşniñ teşkilâtçı firqaları ve areketleri demokratik ve vatandaş teşkilâtlarını aktsiyağa qoşulmağa çağıralar.