«Qardaşlıq» cemaat teşkilâtı Qırımnıñ Rusiye akimiyeti yardımı ile İçtimaiy qırımtatar teleradiokompaniyasınıñ meydanğa ketirilüvinde iştirak etmegenini bildire.
«Bazı matbuat vastalarından bizim İçtimaiy qırımtatar teleradiokompaniyasınıñ meydanğa ketirilüvinde iştiragimiz aqta oığan bildirüvler aqiqatqa ters kele», – denile beyanatta.
«Qırımtatar teleradiokompaniyasınıñ teşkil etilmesi aqta leyhanı ayrı siyasetçilerniñ siyasiy qararı olaraq tanıymız ve onıñ qırımtatar medeniyetine alâqası olmağanı içün oña qol tutmaymız», – deyler teşkilâtta.
«Qardaşlıq» teşkilâtınıñ beyanatında olarnıñ faaliyeti Qırımda yaşağan çeşit halqlarnıñ medeniy zenginligi, tolerantlıq ve maarifçilik üzerinde qurulğanı bildirile.
Malüm olğanı kibi, aprel 2-de, Aqmescitte «Qırım» qırımtatar milliy cemaat areketiniñ, qırımtatar cemaatçılıq temsilcileriniñ umumiy konferentsiyası keçti. Konferentsiya iştirakçileri Aksönovğa muracaat etip, Qırım territoriyasında İçtimaiy Qırımtatar teleradiokompaniyasını (OKTRK) açmağa yardım soradılar.
Aksönov Qırım ükümeti bu teklifke qol tutqanını bildirdi.
Malüm olğanı kibi, aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.