Qırımda aprel 1-de ATR telekanalınıñ işi toqtatılsa da, onıñ hadimleri iş yerlerine keldiler, – dep haber ete Qırım.Aqiqat. Olarnıñ aytqanına köre, olar er kün işke kelecekler.
«Bugün, aprel 1-de, saba ATR telekanalınıñ hadimleri işke keldiler. Bizler işimizni toqtatmaycaqmız, bizler keldik ve işimizge devam etemiz. Er kün çalışacaqmız», – dep ayta ATR telekanalınıñ jurnalisti Safiye Ablâyeva.
Lâle bala telekanalı ve Meydan radiosınıñ hadimleri de iş yerlerine keldiler.
«Sabadan er bir hadim keldi, bizim ümütlerimiz çoq ve bizler çalışmağa azırmız, lâkin qısqa bir teneffüsten soñ», – dep ayttı Meydan radiosınıñ alıp barıcısı Qırım.Aqiqatnıñ mühbirine.
«ATRniñ sabası hadimlernen beraber qoqulı qave ile başlandı. Bizde ananeviy toplaşuv oldı, yaqın vaqıtqa vazifelerimiz belgilendi, bizler olarnı yerine ketirmege azırmız. Mediaholdingge kirgen resurslardan iç biri çalışmasa da, iş esnası yekünlenmey. Bizler ümütlerden vazgeçmeyip, er kün işke kelecekmiz ve çalışacaqmız», – dep ayta ATR telekanalınıñ jurnalisti Zarina Vaapova.
Malüm olğanı kibi, aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.
Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.
Qırımtatar kütleviy haber vastaları arasında Rusiyede yalıñız «Golos Krıma» gazetası qayd oldı, gazeta rusça çıqa. Neşirniñ malümatına köre, gazetanıñ cemi olaraq 6 biñ nushası çıqacaq ve yañı adı olacaq – «Golos Krıma New».