Aqmescitte mart 27 künü ukrain timsallerinden sebep daa bir faalni – Kurtseit Abdullayevni makeme etecekler. Bunı Qurultaynıñ Merkeziy Saylav Komitetiniñ reisi Zair Smedlâyev bildirdi.
Onıñ malümatına köre, 2015 senesi mart 9 künü keçirilgen mіting nizamınıñ bozuluvında qabaatlanğan Kurtseit Abdullayevniñ işi boyunca tоplaşuv Aqmescitniñ Demir yol rayon mahkemesinde saat 11:00 keçecek.
«Onı yasaqlanğan timsallerniñ – ukrain devlet bayrağı – qullanuvında qabaatlaylar! Ukrain devlet timsalleri ne vaqıttan yasaqlanğan ve angi qanunlarda bu yasaq yazılğan, añlatıñ, baqayım!», – dep yazdı Zair Smedlâyev.
Malüm ki, Aqmescitte «politsiya» hadimleri Şevçenko doğğan kününe bağışlanğan mitingniñ teşkilâtçısı Leonid Kuzmin ve daa eki iştirakçini yaqaladılar. Politsiya hadimleriniñ sözlerine köre, sebep – mitingde ukrain timsalleriniñ olması.
Politsiya hadimleri Kuzminni Rusiye Federatsiyansınıñ Memuriy bozuvlar aqqında Kodeksiniñ 20-nci maddesine köre mesüliyetke çektiler – nizamnı bozuv ya da toplaşuv, miting, numayış, yürüş ya da piket ötkerilmesi. Demir yol rayon mahkemesiniñ toplaşuvı mart 10-da saat 11.00 ötkerildi.
Aqmescitliler Şevçenkonıñ 201 yıllığına aktsiyanı Şevçenko abidesi yanında keçirecek ediler. Amma Aqmescit memuriyeti buña izin bermedi.