Mart 23-te Parijde olıp keçken Avropa Şurası Parlament Assambleyasınıñ Migratsiya, qaçaqlar ve köçip kelgen adamlar komitetiniñ toplaşuvında Qırımtatar halqınıñ aq-uquqlarını qorçalav komitetiniñ koordinatorı, Qırımtatar Milliy Meclisiniñ azası Eskender Bariyev Qırımda ğayıp olğan ve öldürilgen adamlar aqqında maruzası ile çıqışta bulundı.
Eskender Bariyevniñ Facebook saifesinde bergen malümatına köre, maruza «Ukraina zıddiyeti devamında ğayıp olğanlar» mevzusı çerçivesinde seslendirildi.
Bariyev ğayıp olğan ve öldürilgen adamlarnıñ sayısı aqqında tarif etti.
Qırımtatar halqınıñ aq-uquqlarını qorçalav komitetiniñ malümatına köre, 2015 senesi fevral 16-da Safiye Atajonova ğayıp oldı. Ğayıp olğan adamlarnı qıdırmaylar, Reşat Ametovnıñ öldürüvi aqqında işi toqtatılğan edi.
Eskender Bariyev qayd etti ki, ğayıp olğan ve öldürilgen adamlarnıñ soy-sopları uquq qoruyıcılar ile bağ tutmağa qorqalar.
«Qırım akimiyeti istese edi, Reşat Ametov, Edem Asanov ve Bilâl Bilâlovnıñ qatilleri apiste olur ediler, em de Timur Şaymardanov, Seyran Ziynedinov, Eskender Apselâmov, İslâm Ceparov, Cevdet İslâmov, Leonid Korj, İvan Bondarets, Vladislav Vaşçuk, Vasiliy Çernış ve Safiye Atojonovanıñ ğayıp olmasınen bağlı bir de bir malümat çıqar edi», – dep qayd etti o.
PACE Ukrainadaki zıddiyetniñ gumanitar aqibetleri maruzacısı Cim Şeridan qayd etti ki: ğayıp olğanlarnıñ soy-sopları vaqtında haber etip, tolu malümat bermekten qorqmamaq kerekler. Onıñ bildirgenine köre, al-azırda Rusiye Federatsiyası ile dialog qurıp, Qırımda ğayıp olğan insanlarnıñ meselesini al etmek kerek.