Birleşken Milletler Teşkilâtınıñ Havfsızlıq şurası cumaaqşam künü, mart 19-da, Rusiye işğal etken Qırım meselesini baqacaq. Bunı BMT yanındaki Ukrainanıñ daimiy temsilcisi Yuriy Sergeyev bildirdi, – dep haber ete Radio Svoboda.
Toplaşuvnı «dost Litvaniya» teşkil etecek, – dep yazdı o Twitterde.
Diplomatnıñ qayd etkenine köre, tedbirge qırımtatar halqınıñ lideri Mustafa Cemilev davet etildi.
Завтра дружня Литва організовує арріа-засідання Ради Безпеки щодо ситуації у окупованому РФ Криму. запрошений М.Джемілев #CrimeaIsUkraine
— Yuriy Sergeyev (@Yuriy_Sergeyev) 18 Березень 2015
Arri formatında keçirilecek toplaşuv qapalı olacaq ve er kes fikirini serbest şekilde bildirecek. Havfsızlıq şurasınıñ resmiy olmağan ve iş planına kirmegen Arri formulası boyunca körüşüvlerge ekspertler ve şaatlar davet etile bile.
Aynı vaqıtta bu format Havfsızlıq şurasınıñ azalarını bunıñ kibi körüşüvlerde iştirak etmege mecbur etmey.
Ğarp diplomatlarından biri bildirdi ki, Rusiye bu toplaşuvda iştirak etmekten vazgeçe.
«Rusiye Qırım Rusiyeniñ qısmı ola ve Havfsızlıq şurasında qanun boyunca muzakere etilecek obyekt degil dep, tedbirni boykot ete», – dep yaza diplomatlarnıñ aytqanlarını «France-Presse» agentligi.
Keçken sene devamında BMT Havfsızlıq şurası Rusiyeniñ Ukraina istilâsınen bağlı tahminen 30 toplaşuv ve körüşüvni keçirgen edi. Olarnıñ çoqusında Havfsızlıq şurasınıñ azaları Rusiyeni sert bir şekilde tenqid etken ediler.