Rusiyeniñ Qırım işğaliniñ bir yılı keçken soñ qırımtatarlar yañı şaraitlerde yaşamaq qorqusı, ğayıp olğan adamlar ve ev ve camilerdeki tintüvler aqqında tarif ettiler. Bu aqqında Reuters levhasında aytıla.
«İç bir vaqıt olmağan edebiyat cedveli bar, yasaq etilgen edebiyat. Bizler yasaq etilgen edebiyat ne olğanını da unuttıq – onı oqumaq mümkün degil, ya da yanında tutmaq yasaq. Bu belli bir risktir, men cep telefonımda olğanlarnı ya da kitap raflarında olğanlarnı kontrol etmek kerekim. Apske oğramaq mümkün, ya da bilmeyim... Men sorağan edim, lâkin bu – hoş bir duyğu degil. Añladım ki, adamlar aytqanlarına diqqat etip başladılar. Eskiden bu ne qırımtatarlar, ne de Ukraina sakinlerine has edi», – dep ayttı Bağçasaray sakini Eskender.
Qırımtatar halqınıñ lideri Mustafa Cemilev qayd etti ki, qırımtatarlar izolâtsiyanıñ bütün qıyınlıqlarına dayanıp olurlar, eñ esası – Rusiye Qırımdan yoq olsun.
«Qırımtatarlarnı aytsaq, olarğa imaye kerekmey. Olar deyler ki, ne qadar fena olsa, o qadar yahşı. Er şeyni qapatıñız, elektriklerni kesiñiz, biz er şeyge dayanırıq, amma olar ketsinler», – dep qayd etti Cemilev.
Your browser doesn’t support HTML5
Qırımtatarlar er şeyge dayanırlar – Cemilev
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.