Qırımdan köçip kelgen adamlarnıñ cemaat teşkilâtları Ukraina Baş prokuraturasına muracaatta bulunıp, Ukraina baş naziri Arseniy Yatsenükni mesüliyetke çektirecek olalar.
Bunı «Ukrain evi» Qırımnıñ iş ve medeniyet işbirligi merkeziniñ reberi Andriy Şçekun mart 11-de Kiyevdeki brifingde bildirdi, dep haber ete Qırım.Aqiqat mühbiri.
Şçekunnıñ bildirgenine köre, Rusiyeniñ yarımada işğalinden bir yıl keçse de, Ukraina akimiyeti qurumında Qırım işleri hızmeti alâ daa yoq.
«Qırım işleri boyunca Devlet hızmetiniñ meydanğa ketirilüv müddeti aqqında – bütün müddetler bitti. Bugün «Vaqtınca işğal etilgen Qırım aqqında» qanun ve 2014 senesi iyül 17-de Nazirler şurası qabul etken qarar bozulmaqta. Bizler Baş prokuraturağa muracaatta bulunıp, vazifelerine uymağan ve olarnı beceremegen Arseniy Petroviçni mesüliyetke çekmege rica etecekmiz», – dep ayttı faal.
Onıñ aytqanına köre, aprel 15-ke qadar böyle bir Devlet hızmeti meydanğa ketirilmese ve «devlet cemaatqa betini köstermese», işğal etilgen Qırımdan köçip kelgenler radikal tedbirlerni keçirecekler.
«Tabiiy ki, barışıq tedbirler: birinciden, Ukraina Nazirler Şurasını piket etecekmiz», – dep ayttı Şçekun.
Mart 10-da Kiyevde «Qırım işğaliniñ yıllığı. Neler yapıldı?» tögerek masası olıp keçti. Nazirler şurasınıñ azaları onı körmemezlikke urdılar. Tedbirde Qırımdan köçip kelgenlerniñ meselelerini al etmek ve yarımadanı işğalden azat etmek içün akimiyetke teklifler qabul etildi.