Aqyar sakinleri mart 9-da, Taras Şevçenkonıñ 201 yıllığı munasebetinen ukrain şairiniñ abidesine çeçeklerni qoydılar. Bunı Aqyar jurnalisti ve cemaat erbabı Mıroslav Mamçak Facebook saifesinde bildirdi.
«Aqyar ükümetiniñ» iş planında Taras Şevçenkonıñ 201 yıllığınıñ qayd etilmesi yoq. Lâkin aqyarlılar saba Kobzar ögünde tiz çökmek içün onıñ Gagarin parkındaki eykeline keldiler. Birer-birer ve 3-4 kişilik gruppalar ile kele ediler. Em büyükler, em de gençler keldi», – dep yazdı o.
Mamçaknıñ aytqanına köre, abide yanında 5 politsiya hadimi, em de «samooboronanıñ» 7 vekili bar edi. Olarnıñ çeçeklerni qoymağa kelgenler arasında zıddiyet olmadı.
Aqyarlılar Şevçenkonıñ eykeline çeçek qoyalar
Malüm ki, Aqmescitte «politsiya» hadimleri Şevçenko doğğan kününe bağışlanğan mitingniñ teşkilâtçısı Leonid Kuzmin ve daa eki iştirakçini yaqaladılar. Politsiya hadimleriniñ sözlerine köre, sebep – mitingde ukrain timsalleriniñ olması.
Aqmescitliler Şevçenkonıñ 201 yıllığına aktsiyanı Şevçenko abidesi yanında keçirecek ediler. Amma Aqmescit memuriyeti buña izin bermedi.