Bağçasarayda politsiya tarafından cami parasınıñ hırsızlığında şeklengen adam yaqalandı. Qırım İçki işler nazirliginiñ matbuat hızmeti bildire ki, 37 yaşında yerli sakin mart 4-te «Bağçasaray» avtostantsiyasında yaqalandı.
«Elde etilgen malümatqa köre, mart 26-da kündüz şübeli adam Bağçasaray rayonınıñ Kokluz köyündeki (Bogatoye Uşçelye) cami binasında bulunıp, içinde tahminen 8 biñ ruble olğan sadaqa parası ile qutunı hırsızladı», – aytıla beyanatta.
Matbuat hızmetiniñ bildirgenine köre, er kişi bundan evel de hırsızlıq, em de narkotikler ile bağlı cinayetler içün mesüliyetke çekilgen edi.
Rusiye Cinaiy kodeksiniñ 158-inci maddesiniñ 1-inci qısmı boyunca (hırsızlıq) cinaiy iş açıldı. Şeklengenni eki yılğa qadar azatlıqtan marum qaldıra bileler.
Malüm ki, Qırımdaki camilerde sadaqa parası sıq-sıq hırsızlanıp başlandı. Belgisiz şahıslar camilerge kirip, sadaqa parasını çıqarğan ediler.
Qırım musulmanları Diniy idaresi cami imamları, musulman cemiyetleriniñ reislerini camilerde sadaqa parasını ve qıymetli şeylerni qaldırmamağa çağırdı.