Rusiye Fevqulâde vaziyetler hızmeti mart ayından Donbassqa üç gumanitar kolonnanı yollaycaq ola. Bunı Buhran vaziyetleri idaresiniñ milliy merkez yolbaşçısınıñ vazifelerini eda etken Aleksey Smirnov bildirdi, dep haber ete TASS Rusiye agentligi.
«Mart ayında gumanitar yüklerni üç kolonna ile yollamağa planlaştırıla. Nevbetteki yardım mart 4-ke belgilendi», – dedi Smirnov.
Keçken aftanıñ soñunda Donbassqa Rusiyeniñ 16-ncı «gumanitar yardımı» kelip çıqtı. Ukraina tarafı onı kene de baqıp olamadı.
Rusiye Ukraina şarqına birinci ihtiyac şeylerini alıp ketkenini bildire. Ukrainanıñ qayd etkenine köre, Rusiye Ukraina izni olmadan, bunıñ kibi «gumanitar konvoylarnı» yollap, Ukraina ve halqara qanunlarını bozmaqta.